Որքա՞ն ձմերուկ օրական կարելի է ուտել մեծահասակներին ու երեխաներին

Ձմերուկը ամառվա գլխավոր ուտելիքն է, քանի որ այն զովացնում է և ծանր չէ օրգանիզմի համար։ Սակայն, ինչպես յուրաքանչյուր ուտելիք, այնպես էլ ձմերուկը, ունի մի սահման և՛ փոքրիկների, և՛ մեծահասակների համար, որից հետո այն հակառակ, վատ էֆեկտ է ունենում։

Երեխաները կարող են օրական 80-150 գրամ ձմերուկի միջուկ ուտել, իսկ մեծահասակները՝ 500 գրամ, հայտնում է «ՌԻԱ Նովոստին»: Ընդ որում, ձմերուկը, ըստ ռուս մասնագետների, չի կարելի օգտագործել ածխաջրերով հարուստ սննդի հետ:

Մանկաբույժ Մարինա Լերմանը պնդում է, որ 2-3 տարեկան երեխայի համար նախատեսված ձմերուկի չափաբաժինը չպետք է գերազանցի 80-100 գրամը: 3-6 տարեկանում ձմերուկի միանգամյա ընդունումը կարելի է ավելացնել մինչեւ 150 գրամի: Իսկ մինչեւ 2 տարեկան երեխաներին ընդհանրապես խորհուրդ չի տրվում ձմերուկ օգտագործել, քանի որ այն կարող է սննդային ալերգիա առաջացնել:

Բժիշկ-թերապեւտ Ելենա Տիխոմիրովան, իր հերթին, նշել է, որ մեծահասակներին խորհուրդ է տրվում օրական ուտել ոչ ավելի, քան 500 գրամ ձմերուկ՝ պայմանով, որ դրա հետ այլ ածխաջրեր չօգտագործվեն: Ըստ մասնագետի՝ ձմերուկ թույլատրվում է ուտել օրվա ցանկացած ժամի, բայց ոչ քնելուց առաջ:

«Պետք չէ սննդի մեկ ընդունման ժամանակ մեկ կիլոգրամ ձմերուկ ուտել, քանի որ մեր օրգանիզմը չի կարող միաժամանակ յուրացնել 60 գրամ մաքուր ածխաջրեր: Կստացվի, որ նա 20-30 գրամը կյուրացնի, իսկ մնացածը ճարպի կվերածի»,-նշել է Տիխոմիրովան:

Աղբյուրը՝ https://med.news.am/arm/news/29591/orqan-dzmeruk-orakan-kareli-e-utel-metsahasaknerin-u-erekhanerin.html